ಈ ಸರ್ಕಾರಿ ಅಧಿಕಾರಿ ಪುಲ್ ಡಿಫರೆಂಟ್, ಸರ್ಕಾರಿ ಅಧಿಕಾರಿ ಅಂದ್ರೆ ಹೀಗಿರಬೇಕು!

ಶಿವಮೊಗ್ಗ: ಬಹುತೇಕ ಸರ್ಕಾರಿ ಅಧಿಕಾರಿಗಳು ಸಾರ್ವಜನಿಕರ ಸಮಸ್ಯೆಗಳನ್ನು ಕೇಳಿ ಆಲಿಸಿ, ಆಯ್ತು ಮಾಡಿಕೊಡುತ್ತೇನೆ. ಮಾಡಿ ಕೊಡಿಸುತ್ತೇನೆ. ನಾಳೆ ಬನ್ನಿ, ನಾಡಿದ್ದು ಬನ್ನಿ. ನಾಳೆ ಆಗಿಯೇ ಬಿಡುತ್ತದೆ ಎಂದು ಕಳುಹಿಸೋರೇ ಹೆಚ್ಚು. ಆದರೇ ಇವರೆಲ್ಲರಿಗೂ ಈ ಸರ್ಕಾರಿ ಅಧಿಕಾರಿ ಪುಲ್ ಡಿಫರೆಂಟ್. ಸಾರ್ವಜನಿಕರ ಸಮಸ್ಯೆಗಳನ್ನು ಡೈರಿಯಲ್ಲಿ ನೋಟ್ ಮಾಡಿಕೊಂಡು, ಅದನ್ನು ಫಾಲೋಅಪ್ ಮಾಡಿ, ಕ್ಲಿಯರ್ ಮಾಡಿಸಿಕೊಡೋ ಸಾಗರ ತಹಶೀಲ್ದಾರ್(Sagara Tahsildar Dr Pratibha) ಇವರು. ಅದು ಯಾರು? ಯಾವ ಊರಲ್ಲಿದ್ದಾರೆ ಅನ್ನೋ ಬಗ್ಗೆ ಮುಂದೆ ಓದಿ...

ಇದು ಹೊಗಳಿಕೆಯಾಗಿ ಬರೆದ ವರದಿಯಲ್ಲ. ತಹಶೀಲ್ದಾರ್ ಮುಂದೆಯೋ ಒಂದಷ್ಟು ಗಂಟೆಗಳ ಕಾಲ ಕುಳಿತು ಕಂಡ ಕಾರ್ಯವೈಖರಿಯ ವರದಿ. ತಹಶೀಲ್ದಾರ್ ಬಳಿಯಲ್ಲಿ ತರಾವರಿ ಸಮಸ್ಯೆ ಹೊತ್ತು ಬರುವಂತ ಜನರನ್ನು ಮಾತುಗಳನ್ನು ಸಾವಧಾನದಿಂದ ಆಲಿಸುವಂತ ಅವರು, ಅದನ್ನು ತಾನೆಲ್ಲಿ ಮರೆತು ಹೋಗಿ ಬಿಡ್ತಿನೋ ಅಂತ ಡೈರಿಯೊಂದರಲ್ಲಿ ಬರೆದುಕೊಂಡು ಬಿಡುವ ಪರಿಯನ್ನು ಕಂಡ ಸತ್ಯದ ದರ್ಶನದ ಸುದ್ದಿ.

ಇಷ್ಟಕ್ಕೇ ಸುಮ್ಮನಾಗದಂತ ಅವರು, ಸಂಬಂಧಪಟ್ಟ ಇಲಾಖೆಯ ಅಧಿಕಾರಿ, ಸಿಬ್ಬಂದಿ ಕರೆದು, ತನ್ನಲ್ಲಿ ಬಂದ ವ್ಯಕ್ತಿಯ ಅರ್ಜಿ, ಅದಕ್ಕೆ ಸಂಬಂಧಿಸಿದಂತ ಫೈಲ್ ತರಿಸಿಕೊಂಡು ಪರಿಶೀಲಿಸಿ, ಸ್ಥಳದಲ್ಲಿಯೇ ಪರಿಹರಿಸೋದಕ್ಕೆ ಸೂಚಿಸುವ ಕಾರ್ಯವೈಖರಿ ಅವರಲ್ಲಿ ಕಂಡ ಚುರುಕು ಕಾರ್ಯವೈಖರಿಯ ಪರಿ.

ಹೀಗೆ ಸರ್ಕಾರಿ ಅಧಿಕಾರಿಯಾಗಿ ಕರ್ತವ್ಯ ನಿರ್ವಹಿಸುತ್ತಿರೋರು ಬೇರೆ ಯಾರು ಅಲ್ಲ. ಶಿವಮೊಗ್ಗ ಜಿಲ್ಲೆಯ ಸಾಗರದ ತಹಶೀಲ್ದಾರ್ ಡಾ.ಪ್ರತಿಭಾ.ಆರ್ ಎಂಬುವರಾಗಿದ್ದಾರೆ. ಕಳೆದ ಕೆಲ ತಿಂಗಳ ಹಿಂದಷ್ಟೇ ಸಾಗರ ತಹಶೀಲ್ದಾರ್ ಆಗಿ ಕರ್ತವ್ಯಕ್ಕೆ ವರದಿ ಮಾಡಿಕೊಂಡ ಡಾ.ಪ್ರತಿಭಾ, ಜನರ ಕಷ್ಟಗಳಿಗೆ, ಸಾರ್ವಜನಿಕರ ಸಮಸ್ಯೆ ನಿವಾರಿಸುವಲ್ಲಿ ನಿರತರಾಗಿದ್ದಾರೆ.

ಸರ್ಕಾರಿ ಕಚೇರಿಯ ಶಾರ್ಪ್ ಸಮಯಕ್ಕೆಲ್ಲ ತಹಶೀಲ್ದಾರ್ ಕಚೇರಿಯಲ್ಲಿ ಹಾಜರಿರುವಂತ ತಹಶೀಲ್ದಾರ್ ಡಾ.ಪ್ರತಿಭಾ.ಆರ್ ಅವರು, ಸಮಸ್ಯೆ ಹೇಳಿಕೊಂಡು ಬರುವಂತ ಜನರನ್ನು ಕಚೇರಿಯಲ್ಲಿ ಕೂರಿಸಿ ಮಾತನಾಡುವ ಪರಿ ಬಂದವರನ್ನೇ ಬೆರಗುಗೊಳಿಸುತ್ತದೆ. ತಾನೊಂದು ಅರ್ಜಿ ಕೊಟ್ಟಿದ್ದೆ, ನನ್ನ ಈ ಕೆಲಸ ಆಗಬೇಕಿತ್ತು. ಇನ್ನೂ ಆಗಿಲ್ಲ ಅಂದ್ರೆ ಸಾಕು, ಫೈಲ್ ಎಲ್ಲಿದೆ ಅಂತ ಕೇಳಿ, ಆ ವಿಭಾಗದ ಅಧಿಕಾರಿ, ಸಿಬ್ಬಂದಿ ಖುದ್ದು ಫೈಲ್ ಸಹಿತ ಕರೆಸುತ್ತಾರೆ. ಕಡತ ಪರಿಶೀಲಿಸಿದ ಬಳಿಕ, ಸಮಸ್ಯೆ ಏನೆಂದು ಬಿಡಿಸಿ ಹೇಳಿ, ದಾಖಲೆ ಬೇಕಿದ್ದರೇ ತಿಳಿಸಿ, ಸ್ಥಳದಲ್ಲೇ ಮಾಹಿತಿ ಒದಗಿಸೋ ಕೆಲಸ ಮಾಡುವ ಪರಿ ಬಂದಿದ್ದವರನ್ನೇ ಬೆರಗುಗೊಳಿಸುತ್ತದೆ.

ಒಂದು ವೇಳೆ ಸಾರ್ವಜನಿಕರು ತಮ್ಮನ್ನು ಕಂಡು ವಿಚಾರಿಸಿದಂತ ಮಾಹಿತಿ, ದಾಖಲೆ ದೊರೆಯದೇ ಇದ್ದಲ್ಲಿ, ಅವರ ಮೊಬೈಲ್ ಸಂಖ್ಯೆಯನ್ನು ಪಡೆದು, ಕಚೇರಿಯ ಸಿಬ್ಬಂದಿಗಳನ್ನು ಕರೆದು ಹುಡುಕಿಸಿ, ಪಡೆದು ಕರೆ ಮಾಡಿ ಒದಗಿಸುವಂತ ಕೆಲಸವನ್ನು ತಹಶೀಲ್ದಾರ್ ಮಾಡುತ್ತಿರುವುದು ನಿಜಕ್ಕೂ ಅಚ್ಚರಿಯೇ ಸರಿ.

ತಹಶೀಲ್ದಾರ್ ಎನ್ನುವ ಕಿಂಚಿತ್ತೂ ಗರ್ವ, ಅಹಂ ಇಲ್ಲದಂತ ಡಾ.ಪ್ರತಿಭಾ.ಆರ್ ಅವರ ಸಹೃದಯ ನಡೆಯನ್ನು ಕಂಡ ಸಾಗರ ತಾಲ್ಲೂಕಿನ ಜನತೆ ಅವರ ಕಚೇರಿಯ ಮುಂದೆ ಬೆಳಗಾದರೇ ಸಾಕು ಸಾಲುಗಟ್ಟಿ ನಿಲ್ಲುವುದನ್ನು ಕಾಣಬಹುದಾಗಿದೆ. ಹೀಗೆ ಕಚೇರಿಗೆ ಬಂದ ಸಾರ್ವಜನಿಕರ ಅಹವಾಲನ್ನು ಅಷ್ಟೇ ಸೌಜನ್ಯದಿಂದ ಕೇಳುವಂತ ಡಾ.ಪ್ರತಿಭಾ.ಆರ್ ಅವರು, ಅದನ್ನು ಪರಿಹರಿಸುವಂತ ಕೆಲಸ ಮಾಡುತ್ತಿದ್ದಾರೆ ಎನ್ನುವುದು ಜನತೆಯ ಮಾತಾಗಿದೆ.

ಕಚೇರಿಯ ಕೆಲಸದ ಹೊರತಾಗಿಯೂ ತಾವು ಸಾಗುವ ದಾರಿಯಲ್ಲಿ ಅಪಘಾತವಾದಾಗಲೂ ದೇವರೆನ್ನುವಂತೆ ದುತ್ತನೇ ಘಟನಾ ಸ್ಥಳಕ್ಕೆ ತೆರಳುವಂತ ಅವರು, ಗಾಯಾಳುಗಳ ನೆರವಿಗೂ ಧಾವಿಸಿದ್ದು ಉಂಟು. ನಮ್ಮ ಊರಲ್ಲಿ ಈ ಸಮಸ್ಯೆ ಇದೆ, ಆ ಸಮಸ್ಯೆ ಇದೆ ಬಂದು ಬಗೆ ಹರಿಸಿ ಅಂದ್ರೂ ಖುದ್ದು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸುವ ಕಾರ್ಯವೈಖರಿ ಬೆರಗುಗೊಳಿಸುತ್ತದೆ.

ಒಟ್ಟಾರೆಯಾಗಿ ಸರ್ಕಾರಿ ಅಧಿಕಾರಿ ಅಂದ್ರೆ ಹೀಗಿರಬೇಕು. ತಹಶೀಲ್ದಾರ್ ಅಂದ್ರೆ ಹೀಗಿರಬೇಕು ಎನ್ನುವುದು ಸಾಗರ ತಾಲ್ಲೂಕಿನ ಜನತೆಯ ಮನೆ ಮನೆ ಮಾತು. ಇಂತಹ ಅಧಿಕಾರಿಯ ಸೇವೆ ಹೀಗೆಯೇ ಮುಂದುವರೆಯಲಿ, ಉತ್ತಮ ಸೇವೆಯನ್ನು ಜನರಿಗೆ ನೀಡಲಿ ಎಂಬುದಾಗಿ ಆಶಿಸೋಣ.

ಶಂಕರ್ ನಾಗ್ ಕೊನೆಯ ಮಾತೇನು..?

ಜುಲೈ ತಿಂಗಳ 1988ರ ಸಮಯದಲ್ಲಿ ಶಂಕರ್ ನಾಗ್ “ಆಕಾಶವಾಣಿ”ಗೆ ಕೊನೆಯ ಸಂದರ್ಶನ ನೀಡುತ್ತಾರೆ. ಈ ಸಂದರ್ಶನದಲ್ಲಿ ತಮ್ಮ ಮನದಾಳದ ಮಾತುಗಳನ್ನು ಹೀಗೆ ಹೇಳಿಕೊಳ್ಳುತ್ತಾರೆ.

ತೂರೂ ರೂ ರೂ‌.. ತೂರೂ ರೂ ರೂ.. ಅರೇ ಅರೇ..

ಕ್ಷಮಿಸಿ ನಿಮ್ಮ ಕಡೆಗೆ ಗಮನ ಹರಿಯಲಿಲ್ಲ. ಅಂದರೆ ನಿಮ್ಮ ಗಮನ ರೆಡಿಯೋ ಮೇಲೆ ಇದೆಯಾ ಇಲ್ವಾ ಅಂತ ಅದಕ್ಕೆ ನಾನು ಅಲಲಾ ಅಲಲಾ ಅಂತ ಹಾಡ್ತಾ ಇದ್ದೆ. ಅಂದಹಾಗೆ ನನ್ನ ಪರಿಚಯ ಮಾಡಿಕೊಳ್ಳಲೇ ಇಲ್ಲ. ಓ ಪರಿಚಯದಲ್ಲಿ ಏನಿದೆ ಮಾರಾಯ ಎಂದು ನೀವು ಹೇಳಬಹುದು. ಪರಿಚಯದಿಂದ ಇದೆ ಇದೆ. ಪರಿಚಯ ಆದರೆ, ನಾವು ನೀವು ಪರಸ್ಪರ ಹತ್ತಿರ ಆಗ್ತೀವಿ. ಅಂದರೆ ನನ್ನ ಮಾತು ಕೇಳಿದರೆ ನಿಮಗೆ, ನಿಮ್ಮ ಮಾತು ಕೇಳಿದರೆ ನನಗೆ, ಒಂಥರ ಅನುಕಂಪ ಪೂರಿತ ವಾತಾವರಣ ನಮ್ಮ ನಿಮ್ಮ ನಡುವೆ ನಿರ್ಮಾಣ ಆಗುತ್ತದೆ. ಅದಕ್ಕೆ ಪರಸ್ಪರ ಪರಿಚಯ ಮುಖ್ಯ. ಅದಕ್ಕೆ ನನ್ನ ಹೆಸರು ನಾಗರಕಟ್ಟೆ ಶಂಕರ, ಉರೂಫ್ ಶಂಕರ್ ನಾಗ್ ಅಂತ..

ನೋಡಿ ಸ್ವಾಮಿ ನಾವೀಗೆ ಇರೋದಕ್ಕೆ ಕಾರಣ “ಒಂದಾನೊಂದು ಕಾಲದಲ್ಲಿ” ಅಂದರೆ ಗಿರೀಶ್ ಕಾರ್ನಾಡ್ ಅವರ ಚಿತ್ರ, ಒಂದಾನೊಂದು ಕಾಲದಲ್ಲಿ. ಆ ಒಂದಾನೊಂದು ಕಾಲದಲ್ಲಿ ಸಿನಿಮಾದಲ್ಲಿ ಅವಕಾಶ ಸಿಗುವ ಮುಂಚೆ, ನಾನು ಬಹಳಷ್ಟು ನಾಟಕಗಳಲ್ಲಿ ಕೆಲಸ ಮಾಡ್ತಾ ಇದ್ದೆ. ಪಾತ್ರ, ನಿರ್ದೇಶನ, ಲೈಟಿಂಗ್, ಬ್ಯಾಕ್ ಸ್ಟೇಜ್ ಎಲ್ಲಾ. ಜೊತೆಗೆ ಬ್ಯಾಂಕ್ ನಲ್ಲೂ ಕೆಲಸಾ ಮಾಡ್ತಾ ಇದ್ದೆ. ಮ್ಯಾನೇಜರ್ ಆಗಿ ಅಲ್ಲ, ಅಕೌಂಟೆಂಟ್ ಅಲ್ಲ, ಓಸಿಯಾಗಿ. ಓಸಿರೀ ಅಂದರೆ ಗೊತ್ತಿಲ್ವಾ ಆರ್ಡಿನರಿ ಕ್ಲರ್ಕ್. ಆ ಒಂದಾನೊಂದು ಕಾಲದಲ್ಲಿ ಬ್ಯಾಂಕ್ ನೌಕರಿ ಕೆಲಸ ಮುಗಿಸಿ, ಒಂದು ನಾಟಕದ ರಿಹರ್ಸೆಲ್ ಮಾಡ್ತಾ ಇರುವಾಗ, ಗಿರೀಶ್ ಕಾರ್ನಾಡ್ ಅವರು ಬಂದರು, ನೋಡಿದರು, ಬಂದರು, ಕೇಳಿದರೂ, “ಸಿನಿಮಾದಲ್ಲಿ ಪಾರ್ಟ್ ಮಾಡ್ತಿಯೇನೋ ಹುಡುಗ..?” ಅಂತ. ಸಿನಿಮಾ ಅಂದರೆ ಸ್ವಲ್ಪ ಭಯ, ಹೆದರಿಕೆ ಇದ್ದೇ ಇತ್ತು. ಆದರೂ ಧೈರ್ಯ ಮಾಡಿ, ” ಓ ಸಿನಿಮಾ ತಾನೇ ಅದರಲ್ಲಿ ಏನಂತೆ ಮಾಡೋಣ ಸಾರ್” ಅಂದೆ. ಚಿತ್ರೀಕರಣ ಪ್ರಾರಂಭ ಆಯ್ತು. ದಾಂಡೇಲಿಯ ಸುಂದರವಾದ ಕಾಡಿನ ಗಾಢ ಅರಣ್ಯದಲ್ಲಿ…

ಒಂದಾನೊಂದು ಕಾಲದಲ್ಲಿ ಸಿನಿಮಾದ ಚಿತ್ರೀಕರಣ ಮುಗೀತು. ಡಬ್ಬಿಂಗ್ ಕೂಡ ಆಯ್ತು, ಪಸ್ಟ್ ಪ್ರಿಂಟ್ ಆಚೆ ಬಂತು. ಸುತ್ತಮುತ್ತ ಇದ್ದ ಕೆಲ ಜನರು, ಅಂದರೆ, ಸಿನಿಮಾದ ಪ್ರೀ ವೀವ್ ನೋಡಿದವರು ” ಓ ಪರವಾಗಿಲ್ವೇ ಹುಡುಗ ಸುಮಾರಾಗಿ ಅಭಿನಯ ಮಾಡ್ತಾನೆ” ಅಂದರು. ಈ ಮಾತು ಕೇಳಿದ್ದೇ ಕ್ಷಣ, ನನ್ನ ಹುಬ್ಬು ತಲೆ ಕೂದಲಿಗೆ ಹೆಗರಿ ಸಿಕ್ಕಾಕೊಂಡಿತು. ಇನ್ ಪ್ಯಾಕ್ಟ್ ನಾನು ಸಿನಿಮಾ ನಟ ಆಗ್ತೀನಿ ಅಂತ ಕನಸು ಮನಸಿನಲ್ಲಿ ಅಂದುಕೊಂಡು ಇರಲಿಲ್ಲ. ರಜತ ಪರದೆ ಮೇಲೆ ಮೊದಲ ಸಲ ನನ್ನನ್ನು ನಾನೇ ನೋಡಿಕೊಂಡಾಗ, ಒಂಥರಾ ಅನ್ನಿಸಿತು. ಇದ್ಯಾಕ್ ನನ್ನ ಮುಖ ಹೀಗೆ ಕಾಣಿಸ್ತಾ ಇದೆ. ಅದ್ಯಾಕೆ ನಡೆಯುವಾಗ ನನ್ನ ಕೈ ಒಂಕ್ ಒಂಕಾಗೀ ಎಲ್ಲೆಲ್ಲೋ ಹೋಗುತ್ತದೆ ಎಂದೆಲ್ಲಾ ಮೊದಲಾದ ಯೋಚನೆಗಳು ಹುಟ್ಟಿಕೊಂಡವು. ಈ ಯೋಚನೆಯಲ್ಲಿ ಇರುವಾಗಲೇ ಅಬ್ಬಯ್ಯ ನಾಯ್ಡು ಅವರ ಕಣ್ಣು ನನ್ನ ಮೇಲೆ ಬೀಳ್ತು. ಅನಂತರ “ಸೀತಾರಾಮು” ಚಿತ್ರದಲ್ಲಿ ನನಗೆ ನಟನೆ ಮಾಡಲು ಒಂದು ದೊಡ್ಡ ಅವಕಾಶ ಕೊಟ್ಟರು.

ಮೊದಲನೆಯ ದಿನ ಚಿತ್ರೀಕರಣಕ್ಕೆ ಹೋದರೆ ನನ್ನ ಹೃದಯ ಅಲ್ಲೇ ನಿಂತು ಬಿಟ್ಟಿತು. ಯಾಕೆಂದರೆ, ಮೊದಲನೆಯ ದಿನವೇ ಸೀತಾರಾಮು ಚಿತ್ರದ ಸೂಪರ್ ಹಿಟ್ ಗೀತೆ ” ಒಂದೇ ಒಂದು ಆಸೆಯೂ ತೋಳಲಿ ಬಳಸಲು. ಒಂದೇ ಒಂದು ಬಯಕೆಯೂ ನಿನ್ನ ಮುದ್ದಾಡಲು ” ಹಾಡಿನ ಚಿತ್ರೀಕರಣ ನಡೆಸಿದ್ದು. ಈ ಹಾಡಿನ ಚಿತ್ರೀಕರಣ ಮುಗಿಯೋ ಅಷ್ಟರಲ್ಲಿ ನಿಂತೋಗಿರೋ ನನ್ನ ಹೃದಯ ಆಚೆನೇ ಬಂತು ಅಂದರೆ, ಅದು ಅತಿಶಯೋಕ್ತಿ ಏನಲ್ಲ. ಯಾಕೆಂದರೆ, ಚಿತ್ರೀಕರಣಕ್ಕೂ ಮುಂಚೆ ಎಲ್ಲೂ ಸ್ಕ್ರೀನ್ ಮೇಲೆ ಹಾಡಿರಲಿಲ್ಲ, ಡ್ಯಾನ್ಸ್ ಅಂದರೆ ಏನೂ ಅಂತ ಗೊತ್ತಿರಲಿಲ್ಲ. ಡೈರೆಕ್ಟರ್ ಸೋಮಶೇಖರ್ ಅವರು, ಡ್ಯಾನ್ಸ್ ಮಾಸ್ಟರ್ ಉಡುಪಿ ಜಯರಾಂ ಅವರು, ಆ್ಯಂಕ್ಷನ್ ಅಂದರು, ಜಿಗಿತ ಜಿಗಿತ ಸ್ಟೆಪ್ ಹಾಕು ಅಂದರು, ನನ್ನ ಪ್ರಯತ್ನ ನಾ ಮಾಡಿದೆ. ಕೈ ಬರಬೇಕಾದ ಜಾಗದಲ್ಲಿ ಜಿಗಿತ, ಕಾಲ್ ಬರೋ ಜಾಗದಲ್ಲಿ ಕೈ ಬರ್ತಾ ಇತ್ತು. ಕೊನೆಗೆ ಸುಸ್ತಾಗಿ ಬಿಟ್ಟು ಒಂದು ಮೂಲೆಯಲ್ಲಿ ಕುಳಿತೆ. ಆಗ ಈ ಚಿತ್ರದ ನಾಯಕಿ ಮಂಜುಳಾ ಬಂದರು. ಧೈರ್ಯ ಕೊಟ್ಟರು. “ಮೊದಲನೆಯ ಸಲ ಹೀಗೆ ಆಗುತ್ತದೆ ಬಿಡಿ. ನನ್ನ ಜೊತೆಗೆ ನೀವು ಒಂದು ಸ್ಟೆಪ್ ಹಾಕಿ ನೋಡಿ, ಎಲ್ಲಾ ಸರಿಹೋಗುತ್ತದೆ ಬನ್ನಿ ” ಅಂತ ಅಂದರು. ಅವರ ಈ ಪ್ರೋತ್ಸಾಹ, ಅವರ ಈ ಸಹಾಯ, ನಾನೆಂದೂ ಮರೆಯೋ ಹಾಗಿಲ್ಲ. ಈ “ಒಂದಾನೊಂದು ಕಾಲದಲ್ಲಿ” ಚಿತ್ರ ಬಿಡುಗಡೆ ಆದನಂತ್ರ, ನನಗೆ ಎಷ್ಟೋ ಚಿತ್ರಗಳಲ್ಲಿ ಮಂಜಳಾ ಜೊತೆಗೆ ಅಭಿನಯಿಸುವ ಅವಕಾಶ ಸಿಕ್ತು. ಆದರೆ ದುಃಖ ಒಂದೇ, ಈ ಒಳ್ಳೆಯ ಕಾಲ ಅವರ ಜೊತೆಗೆ ಕಳೆಯೋಣ ಅಂದರೆ, ಮಂಜುಳಾ ಅವರು ನಮ್ಮ ಜೊತೆಗೆ ಇಲ್ಲ..

ಕೆಲವೊಂದು ಸಲ ಮಂಜುಳಾ ಅಂತಹ ಒಳ್ಳೆಯ ನಟಿ ನಮ್ಮೊಂದಿಗೆ ಇಲ್ಲ ಎಂಬುದನ್ನು ನಂಬೋಕೆ ಆಗಲ್ಲ. ಆದರೆ ಜೀವನ ಇರೋದೆ ಹೀಗೆ ಅನ್ನಿಸುತ್ತದೆ. ಈ ಜೀವನ ಅನ್ನೋದು ನೂರಾರು ಬಣ್ಣಗಳು ಕೂಡಿ, ಎಷ್ಟು ವಿಶಾಲ ಅನಿಸುತ್ತದೋ ಅಷ್ಟೇ, ಸಂಕುಚಿತ ಆಗಿಬಿಡುತ್ತದೆ. ಒಮ್ಮೆ ತಂಪಾಗಿ, ಉದ್ದವಾಗಿ ಕಾಣಿಸೋ ಮೆತ್ತನೆಯ ಹಾಸಿಗೆ, ಕ್ಷಣಗಳಲ್ಲಿ ಸುರುಳಿಯಾಗಿ, ಗತಕಾಲಕ್ಕೆ ಹೊತ್ತುಕೊಂಡು ಹೋಗಿ ಬಿಡುತ್ತದೆ. ಹೊಸ ರೂಪ, ಹೊಸ ಚೈತನ್ಯ ತಂದುಕೊಟ್ಟ ಅನುಭವಗಳು, ಜೀವನವನ್ನು ಸುರುಳಿಯಾಗಿಸಿತಲ್ಲಾ ಅಂತ ದುಃಖನೂ ಆಗುತ್ತದೆ. ಆದರೆ ಜೀವನ ಮಾತ್ರ ನಡದೇ ನಡೆಯುತ್ತದೆ. ” ದೋಣಿವಸಾಗಲಿ ಮುಂದೆ ಹೋಗಲಿ, ದೂರ ತೀರವ ಸೇರಲಿ” ಎನ್ನುವ ಹಾಡಿನ ಸಾಲುಗಳಂತೆ…

ನನಗೆ ದೂರದ ದೇಶಕ್ಕೆ ಹೋಗುವ ಅವಕಾಶ ” ಒಂದು ಮುತ್ತಿನ ಕತೆ” ಚಿತ್ರದ ಮೂಲಕ ಸಿಕ್ತು. ಅದು ಎರಡು ಕಾರಣಗಳಿಂದ ಒಂದು ಸಮುದ್ರದ ಆಳಕ್ಕೆ ಇಳಿದು ಚಿತ್ರೀಕರಣ ಮಾಡಬೇಕಿತ್ತು. ಎರಡನೆಯದು ನೀರಲ್ಲಿ ಆಕ್ಸಿಜನ್ ಮಾಸ್ಕು ಅಥವಾ ಯಾವುದೇ ಸಹಾಯ ಇಲ್ಲದೇ ಚಿತ್ರೀಕರಣ ಮಾಡಬೇಕಾಗಿತ್ತು. ಆಗ ಸ್ವಲ್ಪ ಕಷ್ಟನೇ ಆಯ್ತು. ಕೊನೆಗೂ ಕೆನಡಾಗೆ ಹೋಗಿ ಕ್ಯಾಮರಾ ತಂದು, ಲಂಡನ್ ಗೆ ಹೋಗಿ ಒಂದು ಆಕ್ಟೋಪಸ್ ಮಾಡಿಸಿಕೊಂಡು ಬಂದು, ಮಾಲ್ಡೀವ್ಸ್ ಗೆ ಹೋಗಿ ಜರ್ಮನ್ ಕ್ಯಾಮರಾ ಮ್ಯಾನ್ ಇಟ್ಟುಕೊಂಡು, ಅಂಡರ್ ವಾಟರ್ ಶೂಟಿಂಗ್ ಮಾಡಿದ್ದು.

ಇನ್ನೂ ಸಿನಿಮಾ ಹಾಡುಗಳ ಬ್ಯಾಕ್ ಗ್ರೌಂಡ್ ಮ್ಯೂಸಿಕ್ ರೆಕಾರ್ಡ್ ಮಾಡಬೇಕು ಅಂದರೆ, ಮದ್ರಾಸ್ ಅಥವಾ ಬಾಂಬೆಗೋ ಹೋಗಿ ಮಾಡಬೇಕಿತ್ತು. ಯಾಕೆಂದರೆ ಈ ರೆಕಾರ್ಡಿಂಗ್ ಸೌಲಭ್ಯಗಳು ನಮ್ಮ ಕರ್ನಾಟಕದಲ್ಲಿ ಇರಲಿಲ್ಲ. ಅದಕ್ಕೆ ಪ್ರತೀ ಸಲ ಮದ್ರಾಸ್, ಬಾಂಬೆಗೋ ಹೋಗಿ, ತಿಂಗಳಾನುಗಟ್ಟಲೆ ಲೈನ್ ನಲ್ಲಿ ನಿಂತುಕೊಂಡು, ನಮಸ್ಕಾರ ಸರ್, ನಮಸ್ಕಾರ ಸರ್ ಅಂತ ಮಸ್ಕಾ ಹೊಡೆದು ರೆಕಾರ್ಡಿಂಗ್ ಮಾಡಬೇಕಿತ್ತು. ಕನ್ನಡ ಚಲನಚಿತ್ರ ನಿರ್ಮಾಪಕರ ಈ ಪರಿಸ್ಥಿತಿ ನೋಡಿ, ಅಯ್ಯೋ ಅನಿಸ್ತು. ಸಿನಿಮಾ ತೆಗೆಯೋದು ಕನ್ನಡದಲ್ಲಿ, ನೋಡುವ ಪ್ರೇಕ್ಷಕರು ಕನ್ನಡಿಗರು, ಆದರೆ ಸಂಗೀತ ರೆಕಾರ್ಡ್ ಮಾಡೋರು ಮಾತ್ರ ಮದ್ರಾಸ್, ಬಾಂಬೆನಲ್ಲಿ ಯಾಕೆ ಅನ್ನುವ ಬಹಳ ಯೋಚನೆ ಆಗಿತ್ತು. ಆಗ ಸಿ ವಿ ಎಲ್ ಶಾಸ್ತ್ರಿ, ಅನಂ‌ಗ್‌ನಾಗ್, ರಮೇಶ್‌ಭಟ್, ಸೂರ್ಯ‌ರಾವ್ ಮೊದಲಾದ ಸ್ನೇಹಿತರ ಹತ್ತಿರ ಆರ್ಥಿಕ ಸಹಾಯ ಪಡೆದು, ಬೆಂಗಳೂರಿನ ಕರ್ನಾಟಕ ಫಿಲ್ಮ್ ಚೇಂಬರ್ ಆಫ್ ಕಾಮರ್ಸ್ ಬೆಂಬಲದಿಂದ, ಪ್ರೀ ರೆಕಾರ್ಡಿಂಗ್ ಸ್ಟೂಡಿಯೋ ಮುಖ್ಯಮಂತ್ರಿಗಳಾದ ರಾಮಕೃಷ್ಣ ಹೆಗಡೆ ಅವರಿಂದ ಉದ್ಘಾಟನೆ ಆಯ್ತು. ಕನ್ನಡದಲ್ಲೂ ಒಳ್ಳೆಯ ಹಾಡುಗಾರರು, ಮ್ಯೂಸಿಯನ್ ಇದ್ದಾರೆ ಎನ್ನುವುದನ್ನು ಈ ಮೂಲಕ ತೋರಿಸಿಕೊಡಲಾಯಿತು. ಈ ಸ್ಟೂಡಿಯೋದಲ್ಲಿ ಪ್ರೀ ರೆಕಾರ್ಡಿಂಗ್ ಆದ ಮೊದಲ ಹಾಡೇ ಒಂದು ಮುತ್ತಿನ ಕಥೆ ಸಿನಿಮಾದ ” ಮುತ್ತೊಂದ ತಂದೆ ಕಡಲಾಳದಿಂದ ಅದೇ ಅಂದ ಇಲ್ಲಿ ಕಂಡೆ. ನೀ ನಿಲ್ಲಿ ಕಂಡ ” ಹಾಡು..

ಸ್ನೇಹಿತರೇ ಇಂತಹ ಸಂದರ್ಭಗಳಲ್ಲಿ ಸಂಗೀತ ನಿರ್ದೇಶಕ “ಇಳಯರಾಜ” ನೆನಪಿಗೆ ಬರ್ತಾರೆ. ಅತ್ಯಂತ ಪ್ರತಿಭಾಶಾಲಿ ಸಂಗೀತ ನಿರ್ದೇಶಕ ಇಳಯರಾಜ. ಇವರ ಸಂಗೀತ ಜಗತ್ತೇ ಬೇರೆ, ಇವರ ಟೇಕನ್ ಬೇರೆ. ಇವರೊಂದಿಗೆ ಮ್ಯೂಸಿಕ್ ಕಂಪೋಷನ್‌ಗೆ ಕುಳಿತುಕೊಂಡರೇ, ಸಮಯ ಹೇಗೆ ಕಳೆಯುತ್ತಿತ್ತು ಅಂತ ಗೊತ್ತೇ ಆಗ್ತಾ ಇರಲಿಲ್ಲ. ಯಾವುದಾದರೂ ಒಂದು ಸನ್ನಿವೇಶಕ್ಕೆ ಒಂದೇ ಒಂದು ಟ್ಯೂನ್ ಕೇಳಿದರೆ, ಎಂಟು, ಒಂಭತ್ತು ಟ್ಯೂನ್ ಚಿಟಿಕೆ ಹೊಡೆಯುವಷ್ಟರಲ್ಲಿ ರೆಡಿ ಮಾಡ್ತಿದ್ದರು. ಒಂದಕ್ಕಿಂತ ಒಂದು ಟ್ಯೂನ್ ಸೊಗಸಾಗಿರ್ತಾ ಇತ್ತು. ಅದಕ್ಕೆ ಒಂದು ಉದಾಹರಣೆಯಾಗಿ ಕೊಡಬಹುದಾದ ಹಾಡು ಅಂದರೆ ಅದು ಗೀತಾ ಚಿತ್ರದ ” ಜೊತೆಯಲಿ, ಜೊತೆ ಜೊತೆಯಲಿ ಇರುವೆನು ಹೀಗೆ ಎಂದು ” ಹಾಡು..

ಹೌದು ಅಭಿಮಾನಿಗಳೇ, ಜೊತೆ ಜೊತೆಯಾಗು ಇರೋಣ. ಇದಕ್ಕೆ ನಿಮ್ಮ ಸಹಕಾರ, ಸಹಾಯ ಅತ್ಯಗತ್ಯ. ಹೇಗೆಂದರೆ, ನನ್ನ ಸಿನಿಮಾ ಬಿಡುಗಡೆ ಆದಮೇಲೆ, ನೋಡಿ ದಯವಿಟ್ಟು ನನಗೊಂದ ಸಣ್ಣ ಪತ್ರ ಬರೆಯಿರಿ. ಅದೂ ಸಿನಿಮಾ ಹೇಗೆ ಇಷ್ಟ ಆಯ್ತು ಅನ್ನೋದಕ್ಕಿಂತ ಏನು ಇಷ್ಟ ಆಗಲಿಲ್ಲ ಎನ್ನುವುದನ್ನು ಒತ್ತಿ ಒತ್ತಿ ಬರೆದುಕಳಿಸಿ. ನನ್ನನ್ನು ತಿದ್ದುಪಡಿಸಿ.. ನಾನು ಖುಷಿಯಾಗಿರುತ್ತೇನೆ. ವಿಳಾಸ ನಂಬರ್ 28 ಕ್ರಿಶ್ಚಿಯನ್ ರಸ್ತೆ, ಬೆಂಗಳೂರು 01. ದಯವಿಟ್ಟು ಬರೆಯಿರಿ, ಅಥವಾ ಮನೆಗೆ ಬನ್ನಿ. ಸದಾ ನನ್ನ ಮನೆಯ ಬಾಗಿಲು ತೆರೆದಿರುತ್ತದೆ.

ವಸಂತ ಬಿ ಈಶ್ವರಗೆರೆ

Date 09-03-2015 ರಂದು ಕನ್ನಡ ಪ್ರಭಾ ಪತ್ರಿಕೆಯಲ್ಲಿ ಪ್ರಕಟವಾದ ನನ್ನ ಪತ್ರ

Date 09-03-2015 ರಂದು ಪ್ರಕಟವಾದ ವಿಜಯಕರ್ನಾಟಕ ವಾಚಕರವಾಣಿ ಪತ್ರ. ರಾಮನಗರ ಇಂಜಿನೀಯರಿಂಗ್ ಕಾಲೇಜಿಗೆ ಸಂಬಂಧ ಪಟ್ಟಿದ್ದು

ಪ್ರಜಾವಾಣಿ ಕರ್ನಾಟಕ ದರ್ಶನ

ಹೆಜ್ಜೆ ಹೆಜ್ಜೆಗೂ ಜಲಕನ್ಯೆ

ವಸಂತ ಬಿ ಈಶ್ವರಗೆರೆ

Tue, 10/07/2014

ಬಿಸಿಲಿನಲ್ಲಿ ಬಸವಳಿದ ನೀರ ಸೆಲೆಗಳಿಗೆ ಮಳೆ ಬರುತ್ತಿದ್ದಂತೆ ಜೀವ ತುಂಬುತ್ತದೆ. ಪ್ರಕೃತಿಯ ಅಂದ ಉಮ್ಮಳಿಸುತ್ತದೆ. ಪಶ್ಚಿಮ ಘಟ್ಟದ ವರ್ಷಧಾರೆ ಹಿತ ನೀಡಿದರೆ, ಬಯಲು ಸೀಮೆಯದ್ದು ಮತ್ತೂ ಸೌಂದರ್ಯ. ಮೊಗೆದಷ್ಟೂ ಸಂತೋಷ ತುಂಬಿಕೊಡುವ, ಮಳೆರಾಯನ ಹೆಜ್ಜೆಗಳಂತಿರುವ ಜಲಪಾತಗಳನ್ನು ಕಣ್ತುಂಬಿಕೊಳ್ಳಲು ಇದು ಸಕಾಲ

ಮಳೆಗಾಲ ಶುರುವಾದರೆ ಸಾಕು, ಹಸಿರು ಮೂಡಿ, ಹೊಸ ಸೊಬಗು ಪಡೆಯುವ ಪಶ್ಚಿಮಘಟ್ಟದ ಧರೆ, ಮಳೆಯ ಸಂಭ್ರಮದೊಳಗೆ ಮತ್ತಷ್ಟು ಪ್ರವಾಸಿಗರನ್ನು ಆಕರ್ಷಿಸುತ್ತದೆ. ಮಲೆನಾಡ ಸೆರಗೊಳಗಿನ ಈ ಪ್ರವಾಸ ಮಳೆಯಲಿ, ಜೊತೆಯಲಿ ಎನಿಸೋದು ಖಂಡಿತ.

ಅಂದಹಾಗೆ, ಈ ಮಲೆನಾಡ ಭುವಿಗೆ ಮಳೆರಾಯ ಸಣ್ಣ ಹನಿಯಿಂದ ಹಿಡಿದು, ಆಕಾಶಕ್ಕೆ ತೂತು ಬಿದ್ದಿದೆಯೆನೋ ಎನ್ನುವಷ್ಟರ ಗಾತ್ರದಲ್ಲಿ ಬೀಳುತ್ತಾನೆ. ಮಳೆಯ ಹನಿಗಳು ಕೆಲವೊಮ್ಮೆ ರೋಮಾಂಚನ ಮೂಡಿಸಿದರೆ, ಇನ್ನೂ ಕೆಲವೊಮ್ಮೆ ಸುರಿಯುವ ಅತಿಯಾದ ಮಳೆ, ಅನಾಹುತಗಳಿಗೂ ಆಹ್ವಾನ ನೀಡುತ್ತದೆ. ಎಷ್ಟೇ ಆಗಲೀ ಇವೆಲ್ಲ ಪ್ರಕೃತಿ ನಿಯಮವಲ್ಲವೇ...

ಎಲ್ಲೋ ಬೀಳುವ ಮಳೆಯ ನೀರು, ಇನ್ನೆಲ್ಲೋ ನದಿಯಾಗಿ ಹರಿದು, ಸಾಗರ ಸೇರುವ ಪರಿ, ಕೆಲವೊಂದು ಕಡೆ ಜಲಪಾತಗಳನ್ನು ಸೃಷ್ಟಿಸುವ ರೀತಿ ನಿಜಕ್ಕೂ ವಿಸ್ಮಯ. ವರ್ಷಋತುವಿನಲ್ಲಿ ಬಾಬಾಬುಡನ್‌ಗಿರಿ, ಮುಳ್ಳಯ್ಯನಗಿರಿ ಶ್ರೇಣಿ, ಕೊಟ್ಟಿಗೆಹಾರದ ಚಾರ್ಮಾಡಿ ಘಾಟ್, ಕುದುರೆಮುಖದ ಆಸುಪಾಸು, ಶೃಂಗೇರಿ, ಕೊಪ್ಪ ತಾಲ್ಲೂಕುಗಳಲ್ಲಿ ಸಂಚರಿಸುವುದೇ ಮಸ್ತ್ ಮಜಾ.

ಮಳೆ ಬಂತೆಂದರೆ, ನೆಲದೊಳಗೆ ಹುದುಗಿ ಕುಳಿತ ಸಸ್ಯಗಳು ತಲೆ ಎತ್ತುತ್ತವೆ.  ನೆಲ ಸಂಪಿಗೆ, ಡೇರೆ, ಗೌರಿ ಹೂ, ಗೋಪುರದ ಹೂವುಗಳ ಜೊತೆ ಕೆಂಪು, ಹಳದಿ ಬಣ್ಣದ ಗೌರಿ ಹೂವು ಬೇಲಿ ಸಂದಿನಿಂದ ಹೊರಬಂದು ಇಣುಕಿ ನೋಡುತ್ತದೆ. ಅಲ್ಲಲ್ಲಿ ಬೆಳೆಯುವ ಅಣಬೆಗಳು ಕಣ್ಣಿಗೆ ಮುದ ನೀಡುತ್ತವೆ. ಇಲ್ಲಿನ ಹಳ್ಳಗಳಲ್ಲಿ ಏಡಿ, ಮೀನುಗಳು ಕುಣಿದಾಡುತ್ತವೆ.

ಕೊಟ್ಟಿಗೆ ಹಾರಕ್ಕೆ ಪಯಣ...
ಚಿಕ್ಕಮಗಳೂರಿನ ಕೊಟ್ಟಿಗೆ ಹಾರದಿಂದ ಧರ್ಮಸ್ಥಳ ಕಡೆಗೆ ಪ್ರವಾಸ ಬೆಳೆಸುವಾಗ ಮಳೆ ಸಿಕ್ಕರಂತೂ ರೋಮಾಂಚನ. ಕಣ್ ಮುಂದೆ ಹಾದು ಹೋಗುವ ಮುಗಿಲು ಚುಂಬಿಸುವ ಪರ್ವತ ಶ್ರೇಣಿಗಳು, ಎಡೆಎಡೆಗೂ ಸಿಗುವ ಹಾಲ ನೊರೆಯಂತೆ ಅಲ್ಲಲ್ಲಿ ಧುಮುಕುವ ಜಲಧಾರೆಗಳ ಸೊಬಗು ಮನಮೋಹಕ.

ಇಲ್ಲಿನ ಧರೆಯಲ್ಲಿ, ಬೆಟ್ಟ ಗುಡ್ಡ, ಗಿರಿಶೃಂಗಗಳ ರಾಶಿಯಲ್ಲಿ ಪ್ರವಾಸಿಗರಿಗೆ ಏನೆಂದರೂ ಐದು ಕಿಲೋಮಿಟರ್ ಅಂತರದಲ್ಲಿ, 10ಕ್ಕೂ ಅಧಿಕ ಜಲಕನ್ಯೆಯರನ್ನು ನೋಡುವ ದರ್ಶನ ಭಾಗ್ಯ ದೊರೆಯುತ್ತದೆ. ಒಂದೊಂದು ಜಲಧಾರೆಗಳೂ ಒಂದಕ್ಕಿಂತ ಒಂದು ಬಲು ಚೆಲುವು. ಜುಳು ಜುಳು ನಾದ ಗೈಯ್ಯುತ್ತಾ, ಬೆಟ್ಟದ ಹಸಿರಿನೊಳಗಿನಿಂದ ವೈಯಾರ ಮಾಡುತ್ತಾ ಧುಮ್ಮಿಕ್ಕುವ ಇವು, ಚಿಕ್ಕಮಗಳೂರಿನ ನಿಮ್ಮ ಪ್ರವಾಸದಲ್ಲಿ ಸದಾ ಜೊತೆಯಾಗುವ ಸಂಗಾತಿ.

ಇನ್ನೂ ನೀವು ಇಲ್ಲಿನ ಅಲೆಖಾನ್ ಹೊರಟ್ಟಿ ಮಾರ್ಗವಾಗಿ ಹೋಗುವ ತಿರುವಿನಲ್ಲಿ ಸಿಗುವ ಜಲಧಾರೆ ವರ್ಷಪೂರ್ತಿ ಹರಿದರೆ, ಇಲ್ಲಿ ಹರಿಯುವ ಇತರೆ ಜಲಪಾತಗಳು, ಮಳೆಗಾಲದಲ್ಲಿ ಮಾತ್ರ ಹರಿದು, ಮಾಯವಾಗುತ್ತವೆ.

ಕಳಸದ ಅನುಭವ

ಚಿಕ್ಕಮಗಳೂರಿನಿಂದ ಕಳಸ ಮಾರ್ಗವಾಗಿ ಹೊರಟರೆ ಪ್ರವಾಸ ಮತ್ತಷ್ಟು ಹೊಸ ಅನುಭವ ನೀಡುತ್ತದೆ. ಇಲ್ಲಿ ಸಿಗುವ ಕಾಫಿ ತೋಟಗಳ ಸಾಲು ಸಾಲು ಚಿಲಿಪಿಲಿ ಗುಟ್ಟುವ ಅತಿ ವಿರಳ ಬಾನಾಡಿ ಹಕ್ಕಿಗಳು, ಉಕ್ಕಿ ಸೊಕ್ಕಿ  ಹರಿಯುವ ತೊರೆಗಳು ಮುದ ನೀಡುತ್ತವೆ.

ಮಳೆಗಾಲದಲ್ಲಿ ತುಂಬಿ ಉಕ್ಕುವ ಜೀವ ನದಿ ಭದ್ರೆಯ ಒನಪು ವೈಯ್ಯಾರ ವರ್ಣನೆಗೆ ನಿಲುಕದ್ದು. ಈ ಸೌಂದರ್ಯ ರಾಶಿಯನ್ನು ಸವಿದು ಕುದುರೆಮುಖದತ್ತ ಸಾಗಿದರೆ, ಎಳೆನೀರು ಎಂಬ ಗ್ರಾಮ ಎದುರಾಗುತ್ತದೆ. ಈ ಗ್ರಾಮ ಸಮೀಪಿಸುತ್ತಿದ್ದಂತೆ ಎದುರಾಗುತ್ತಾರೆ ಬಳಕುವ ಜಲಕನ್ಯೆಯರು!

ಚಿಕ್ಕಮಗಳೂರು -ದಕ್ಷಿಣ ಕನ್ನಡ ಜಿಲ್ಲೆಯ ಗಡಿ ಪ್ರದೇಶದಲ್ಲಿ ಬರುವ ಈ ಸೊಗಸಾದ ಜಲಪಾತ, ಒಂದು ಸಾವಿರಕ್ಕೂ ಅಧಿಕ ಅಡಿಗಳ ಎತ್ತರದಿಂದ ಎರಡು ಹಂತವಾಗಿ ಹರಿಯುತ್ತದೆ. ಹೊತ್ತು ಮುಳುಗಿದರೂ ಇಲ್ಲಿಂದ ಹೊರಡಲು ಮನಸ್ಸೇ ಆಗುವುದಿಲ್ಲ.

ಇದರ ಗುಂಗಿನಲ್ಲಿ ಸುಮಾರು ಐದು ಕಿಲೋಮೀಟರ್ ದೂರ ಕ್ರಮಿಸಿದರೆ, ದಕ್ಷಿಣ ಕನ್ನಡ ಜಿಲ್ಲೆಯ ಸಂಪರ್ಕ ಪಡೆಯಲು ಸಾಧ್ಯವಿದ್ದರೂ ಪರಿಸರ ರಕ್ಷಣೆ ನೆಪದಿಂದ ಹಾಳಾದ ರಸ್ತೆಯಲ್ಲೇ ಜಲಪಾತ ಸೃಷ್ಟಿಸಿರುವ ‘ಯಳನೀರ ಫಾಲ್ಸ್’ ಕಣ್ಣು ತುಂಬಿಕೊಳ್ಳಬಹುದು. ಈ ಜಲಪಾತ ಸುಮಾರು 120 ಕಿ.ಮೀ ದೂರದಷ್ಟು ಸುತ್ತಿ ಬಳಸಿ ತಾಲ್ಲೂಕು ಕೇಂದ್ರ ಬೆಳ್ತಂಗಡಿಯನ್ನು ಸೇರುತ್ತದೆ.

ನಮ್ಮೂರಿನ ಮುನ್ನಾರ್
ಅಲ್ಲಿಂದ ಕುದುರೆಮುಖ ಶ್ರೇಣಿಯತ್ತ ಕಾಲಿಟ್ಟರೆ, ಗಣಿಗಾರಿಕೆ ನಿಂತು, ಸಂರಕ್ಷಿತಾರಣ್ಯವಾಗಿ ಮಾರ್ಪಟ್ಟಿರುವ ಇಲ್ಲಿನ ತಂಪು ಹಸಿರ ಸಿರಿಯನ್ನು ಕಾಣಬಹುದು. ಇಂತಹ ಸೌಂದರ್ಯವನ್ನು ದೇವರ ನಾಡೆಂದೇ ಕರೆಯುವ ಕೇರಳದಲ್ಲಿ ಸಾಕಷ್ಟು ಕಡೆ ಕಾಣಬಹುದಾದರೂ, ಈ ಸ್ಥಳವನ್ನು ನಮ್ಮೂರಿನ ಮುನ್ನಾರ್ ಎನ್ನಬಹುದು.

ಈ ‘ಮುನ್ನಾರ್‌’ ನೋಡಿ ಚಿಕ್ಕಮಗಳೂರು ಜಿಲ್ಲೆಯ ಶೃಂಗೇರಿಯತ್ತ ಹೆಜ್ಜೆ ಹಾಕಿದರೆ, ಚಹಾ ತೋಟ, ಭದ್ರಾ ನದಿ, ಹಸಿರ ಸಿರಿ ಮತ್ತೆ ಕಣ್ಣು ತುಂಬುತ್ತದೆ. ಹಾಗೆಯೇ ಮುಂದೆ ಸಾಗಿದರೆ ದಾರಿಯ ಅಂಚಿನಲ್ಲೇ ‘ಕಡಾಂಬಿ’ ಎಂಬ ಸುಂದರ ಜಲಪಾತ ಸ್ವಾಗತವೀಯುತ್ತವೆ.
ದಟ್ಟ ಕಾಡಿನ ಮಧ್ಯದಿಂದ ಧುಮ್ಮಿಕ್ಕಿ ಬೀಳುವ ನೀರು, ನೀರಿನೊಂದಿಗೆ ಜೊತೆಗೂಡುವ ಜೀರುಂಡೆಗಳ ಸದ್ದು, ಜಲಪಾತದ ಪಕ್ಕದಲ್ಲಿಯೇ ಅತ್ತಿಂದಿತ್ತ ಸಾಗುವ ವಾಹನಗಳ ಭರಾಟೆಯ ನಡುವೆಯೂ ಈ ಜಲಧಾರೆ ಮನಸ್ಸನ್ನು ಹಗುರಗೊಳಿಸುತ್ತದೆ.

ಚಾರಣಿಗರ ಸ್ವರ್ಗ

ನೀವೇನಾದರೂ ಸಾಹಸಿ ಚಾರಣಿಗರಾಗಿ, ಟ್ರೆಕ್ಕಿಂಗ್ ಪ್ರಿಯರಾಗಿದ್ದರೆ, ಬಾಳೆ ಹೊನ್ನೂರಿನಿಂದ ಕಳಸಕ್ಕೆ ಹೋಗುವ ಮಾರ್ಗ ಮಧ್ಯೆ ಸಿಗುವ ಬಾಳೆಹೊಳೆಯಲ್ಲಿ ಜಲಸಾಹಸ ಕ್ರೀಡೆಯನ್ನು ಕೈಗೊಳ್ಳಬಹುದು.

ಈ ಕ್ರೀಡೆಗಳನ್ನು ಖಾಸಗೀ ಸಂಸ್ಥೆ ನಡೆಸುತ್ತಿದ್ದು, ಭೋರ್ಗರೆದು ಹರಿಯುವ ಭದ್ರೆಯಲ್ಲಿ ಸುಮಾರು 8 ಕಿ.ಮೀ ದೂರದವರೆಗೂ ಗಾಳಿ ತುಂಬಿದ ದೋಣಿಯಲ್ಲಿ ನೀವೇ ಹುಟ್ಟು ಹಾಯಿಸುತ್ತಾ, ಭದ್ರೆಯ ಒಡಲನ್ನ ಸೀಳಿಕೊಂಡು ಮುಂದೆ ಸಾಗಬಹುದು. ಇಷ್ಟೇ ಅಲ್ಲ. ರೈಲು ಮಾರ್ಗವಾಗಿ ಚಿಕ್ಕಮಗಳೂರಿಗೆ ತೆರಳಿದಾಗ ಕಡೂರಿನಲ್ಲಿ ಇಳಿದು, ಸಕರಾಯಪಟ್ಟಣ ಮಾರ್ಗವಾಗಿ ತೆರಳುವಾಗ ಸಕರಾಯಪಟ್ಟಣದಿಂದ ಕೇವಲ 5 ಕಿ.ಲೋ ಮೀಟರ್ ದೂರದಲ್ಲಿರುವ ಅಯ್ಯನ ಕೆರೆ ಎಂಬ ಐತಿಹಾತಿಕ ಕೆರೆಯನ್ನ ನೋಡಬಹುದು. ಇದು ಚಿಕ್ಕಮಗಳೂರಿನಿಂದ ನೋಡಲು ಹೊರಟರೆ 18 ಕಿ.ಲೋ.ಮೀಟರ್ ದೂರವಾಗುತ್ತದೆ.

ಇದಾದ ನಂತರ ಸುಮಾರು 45 ಕಿ.ಲೋ ಮೀಟರ್ ದೂರದಲ್ಲಿನ ಬಾಳೆಹೊನ್ನೂರು ಮಠ, ಬಾಬಾಬುಡಯ್ಯನ ಗಿರಿಯಲ್ಲಿರುವ ದತ್ತಾತ್ರೇಯ ಪೀಠ, ಹೊಯ್ಸಳರ ಕಾಲದ ಐತಿಹಾಸಿಕ ಬಲ್ಲಾಳರಾಯನ ದುರ್ಗ, ಬೆಲವಾಡಿ ದೇವಸ್ಥಾನ, ತರೀಕೆರೆಯತ್ತ ತೆರಳಿದರೆ ಸುಮಾರು 18 ಕಿಲೋ ಮೀಟರ್ ದೂರದಲ್ಲಿರುವ ಭದ್ರಾ ಅಭಯಾರಣ್ಯ ನೋಡಬಹುದು. ಇವಲ್ಲದೇ ಹೊರನಾಡು, ಕಳಸ, ಕೆಮ್ಮಣ್ಣುಗುಂಡಿ, ಚಿಕ್ಕಮಗಳೂರು ಸಮೀಪವೇ ಇರುವ ಸುಂದರ ಪಾರ್ಕ್ ಆದಂತ ರತ್ನಗಿರಿ ಬೋರೆಯಲ್ಲಿ ಮಕ್ಕಳ ರೈಲನ್ನೇರಿ ಸಂಭ್ರಮಿಸಿ. ಇನ್ನೂ ಚಿಕ್ಕಮಗಳೂರು ಬೇಲೂರು ಮಾರ್ಗದಲ್ಲಿ ಸಿಗುವ ಹಿರೇಮಗಳೂರು ಕೋದಂಡರಾಮ ಸ್ವಾಮಿ ದೇವಸ್ಥಾನವನ್ನು ನೋಡಬಹುದು. ‘ಮಳೆಯ ಪ್ರವಾಸ’ ಇಷ್ಟೆಲ್ಲ ಸಂತಸದ ಕ್ಷಣಗಳನ್ನು ಹುಟ್ಟು ಹಾಕಿದರೂ, ಅಲ್ಲಲ್ಲಿ ನಿಮಗೆ ಅರಿವಿರದೆ ಕಾಟ ಕೊಡುವ ಉಂಬಳಗಳ ಬಗ್ಗೆ ಎಚ್ಚರಿಕೆ ವಹಿಸುವುದು ಒಳಿತು.